Tips til ein aktiv haust i Valldal
Sommaren takkar snart av, og no står ein frisk haust full av mulegheiter for tur. I Valldal er det alltid noko å finne på uansett årstid.
Hausten kan by på både varme fønvindar frå aust og kalde vindar frå nordvest. Uansett ver vil ein familiedag hos Valldal Aktivitetspark by på kjekke utfordringar og minnerike opplevingar.
Har du sesongkort er hausten heilt perfekt for å få valuta for pengane då vi har mindre pågang, god plass og lite kø. Har du vore på besøk hos oss tidlegare i år er du også fritatt for opplæring og kan svinge deg rett opp i favorittløypa når du har sjekka inn. Kanskje har du ein bursdag du vil feire? Kiosken vår har “verdas beste” sjokoladekake og deilige grillpølser.
Friske opplevingar i rufsete haustvêr kan vere ei oppleving i seg sjølv berre ein kler seg godt. Ull innerst, varme ullstrømper og vasstette sko er lurt for å halde seg varm på beina. Og held ein seg varm på beina kan ein kanskje rekke å klatre gjennom alle løypene før ein gir seg for dagen?
Å samle familien rundt ei vedfyrt bålpanne med noko godt på grillen er ein viktig del av opplevinga på ein dag ute i naturen. Vi har to store bålpanner med god plass rundt, og bord med benkar både under tak og ute. Ta med favorittmaten din og lag deg ein god utelunsj med familien.
Vi held ope kvar laurdag fram til midten av september. For grupper kan vi også halde ope andre dagar, det er berre å ta kontakt med oss på e-post. Om vêret blir bra, kjem vi også til å halde ope nokre dagar i haustferien.
I sentrum finn du Kulå Bowling og TrollDungeon escapelabyrint i same bygget. Hos Kulå har dei ope fredag til søndag utover hausten og elles ope på bestilling i vekedagane. Fire bowlingbaner, biljard og air-hockey er aktivitetar som fengar dei fleste. Dei byr også på gourmetburger og ulike typar pizza, i tillegg har dei barnemeny.Hos TrollDungeon tek dei kun imot grupper på bestilling, så det er lurt å planlegge turen til Valldal, enten det er storfamilien eller jobben som skal på tur. Tilrådd aldersgrense i escapelabyrinten er 12 år, men det er mulig å ta med yngre barn ned til 8 år i lag med vaksne. Sidan dette er ein innandørs aktivitet vil veret aldri bli ei utfordring. Ein runde i escapelabyrinten tek ca 30 minutt å gjennomføre, og maks 5 personar kan gå inn samtidig.
For familiar med litt større barn vil det vere ei fantastisk oppleving å padle ut på fjorden, og få oppleve den storslåtte naturen. Uteguiden har turar på bestilling, og ein familietur varer i 3 timar. Med dobbelkajakkar ferdast ein trygt og stabilt på fjorden og barn heilt ned til 5 år kan delta på turen. Varme drakter og godt utstyr gjer turen komfortabel sjølv på hausten. Book familietur med Uteguiden her.
Det er lett å bruke fleire dagar når ein tek turen inn til vakre Valldal og området rundt. Dersom du treng overnatting er her alt frå hytter til hotell. Valldal Fjordhotell har ope for bestillingar utover hausten, og ligg fint plassert rett ved fjorden. Det same har Blåtind Boutique Hotel i Stordal. Her har vi ein oversikt over overnattingsplassar i onrådet.
Stopp gjerne innom eit gardsutsal på veg heimover for nypoteter, gulrot, kål, epler og pærer, og agurk. Gardsutsal finn du på Døving, Myklebust, hos Storstova, på Berdal og på Linge.
Om du treng hjelp til planlegginga, så ta kontakt med oss på epost post@valldalaktivitetspark.no eller telefon +47 480 90 599
